ភ្នំពេញ៖ រដ្ឋបាលជលផលបានសម្រេចបិទនេសាទតាមតំបន់នានានៅទូទាំងប្រទេសកម្ពុជាជាបណ្ដើរៗចាប់ពីថ្ងៃទី១ ខែមិថុនាតទៅ ដោយក្នុងអំឡុងពេលបិទនេសាទនេះរដ្ឋបាលជលផលអនុញ្ញាតឱ្យប្រើតែឧបករណ៍នេសាទបែបគ្រួសារប៉ុណ្ណោះ។

ក្នុងសេចក្ដីជូនដំណឹងចុះថ្ងៃទី២០ ខែឧសភា ឆ្នាំ២០២៤ ប្រធានរដ្ឋបាលជលផលលោក ពុំ សុថ បានឱ្យដឹងថាចាប់ពីថ្ងៃទី១ ខែមិថុនា ដល់ថ្ងៃទី៣១ ខែតុលា ដែននេសាទទឹកសាបរួមមាន កំពង់ឆ្នាំង ពោធិសាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម និងមួយផ្នែកនៃរាជធានីភ្នំពេញ និងខេត្តកណ្ដាល ដែលស្ថិតនៅខាងជើងខ្សែស្របទន្លេចតុមុខ។ ដោយឡែកផ្នែកខាងត្បូងខ្សែស្របនៃទន្លេចាក់ចតុមុខ និងខេត្តមួយចំនួនទៀតដូចជា ព្រៃវែង ស្វាយរៀង តាកែវ កំពង់ស្ពឺ នឹងចាប់បិទនេសាទពីថ្ងៃទី១ ខែកក្កដា ដល់ថ្ងៃទី៣១ ខែតុលា។

 រដ្ឋបាលជលផលបានបញ្ជាក់ថា៖ «ក្នុងរដូវបិទនេសាទនេះ អ្នកនេសាទទាំងអស់ត្រូវប្រើតែឧបករណ៍នេសាទគ្រួសារ ដែលមានចែងក្នុងប្រកាសលេខ២៥៨ ប្រក.កសក ចុះថ្ងៃទី២២ ខែតុលា ឆ្នាំ២០១២»។

ចំពោះឧបករណ៍នេសាទគ្រួសារលោកអ្នកអាចស្វែងរកមើលបានតាមប្រកាសដែលមានដាក់នៅខាងក្រោម៕